العلاقات الاجتماعية

فيه مشكلتين أساسيتين تانيين ممكن إنكم تلاقوهم قدامكم وإنتم على باب الجامعة...
إنكم مش شرط تلاقوا أصحابكم اللي كانوا معاكم في ثانوي معاكم في الجامعة لأن كل واحد ممكن إنه يدخل جامعة غير التاني أو كلية غير التاني. وبكده ممكن تلاقوا نفسكم في الجامعة لوحدكم ومش معاكم حد تعرفوه نهائي. وبالتالي ممكن إنكم تحسوا بالوحدة وإنكم مش حابّين الجامعة ولا اللي فيها...
شوفوا يا شباب الإنسان كائن اجتماعي بطبعه ومايقدرش يعيش لوحده من غير ما يكلم حد ولا حد يكلمه، علشان كده لو لاقيتم نفسكم لوحدكم في الجامعة ومش معاكم حد تعرفوه إيه المانع إنكم تعملوا صداقات جديدة مع اللي موجودين حواليكم، وتتكلموا مع اللي حواليكم.. وعلى فكرة مش عيب أبدا إن الإنسان يبدأ بالكلام مع اللي حواليه بل بالعكس، ده بيفتح قدامه باب واسع من الصداقات اللي ممكن إنها تفيده في حياته حتى بعد الجامعة...
وياريت كمان تكوين الصداقات الجديدة مايكونش مقصور على الزملاء في السنة الدراسية بل يمتد ليشمل الطلاب المتقدمين في المراحل الدراسية الأخرى علشان تستفيدوا من خبراتهم السابقة لأن أكيد الطلاب دول عندهم خبرة أكتر عن نظام الدراسة في الكلية.
كمان خدوا بالكم من حاجة مهمة قوي وهي إن الحياة في الجامعة بتختلف عن الحياة في المدرسة وده لأن الجامعة فيها أنشطة كتير ممكن إنكم تشتركوا فيها زي "اتحاد الطلاب" و"الأسر الجامعية" وعلى فكرة الأنشطة دي بتفيد جدا في التعرف على ناس كتير وبتنمي القدرات على الاتصال بالآخرين اللي ممكن إنها تفيد في الحياة العملية بعد الجامعة..

فيه ناس كتير كانت حياتهم قبل الجامعة مافيش فيها اختلاط نهائي وبالتالي لما بيدخلوا الجامعة بيلاقوا مشكلة وهي إن البنات مش عارفة تتعامل مع الأولاد والأولاد مش عارفين يتعاملوا مع البنات..
شوفوا يا شباب الكلام مع الجنس الآخر مش عيب مادام في حدود الأدب والزمالة البريئة.. عادي جدا إنك تكلم زميلة ليك في الجامعة وتسألها عن أي حاجة وهي كمان تكلمك وتسألك عن أي حاجة مش عارفاها مع مراعاة شوية الحاجات دي..
1- إن العلاقة بين البنت والولد ليها حدود يعني مثلا بلاش موضوع الهزار بالإيدين والكلام والضحك بصوت عالي لأن الحاجات دي بتدي انطباع سيئ عند باقي الزملاء.
2- ياريت الكلام بين البنت والولد يكون مقصور في حدود الدراسة والجامعة والموضوعات العامة وبلاش الدخول في تفاصيل شخصية لحياة كل واحد منهم.
3- عدم تفسير أي كلمات أو اهتمام من الآخرين على إنه أساس لعلاقة حب علشان ماتدخلوش في دوامة الوهم أو الحب من طرف واحد واللي بتكون نتيجة لاعتقادات خاطئة وتصورات ليس لها أي أساس من الصحة.
4- علشان تريحوا بالكم من أي مشاكل ممكن إنكم تقعوا فيها خلوا عندكم هدف واحد بس وهو إن الجامعة ما هي إلا مكان للدراسة واكتساب العلم وتكوين صداقات، مش لحاجة تانية، يعني من الآخر وبمنتهى الصراحة بلاش توقعوا نفسكم في قصص حب مكتوب لها الفشل وركزوا في دراستكم ومستقبلكم فقط لا غير.