طبعا اللبس والشكل هو أول مشكلة ممكن إنها تقابل البنت أو الشاب المقبلين على الحياة الجامعية الجديدة..
بيحسوا إنهم متلخبطين ومش عارفين يلبسوا إيه وعايزين لما ينزلوا يشتروا لبس الجامعة يجيبوا كل حاجة ممكن إنها تقابلهم من غير ما يفكروا أو يسألوا نفسهم السؤال المهم: إيه هو اللبس المناسب للجامعة؟
وكمان فيه ناس تانيين عايزين يغيروا شكلهم اللي كانوا عليه في ثانوي فما بيصدقوا يدخلوا الجامعة ويقلدوا النجوم، يعني مثلا تلاقي الولد عمل تسريحة "تامر حسني" والبنت عاملة مكياج "نانسي عجرم" من غير ما يفكروا في الشكل المناسب اللي المفروض يدخلوا بيه الجامعة...
طبعا بتسألوا نفسكم دلوقتي وتقولوا إيه ده؟ هو معقول فيه لبس وشكل محدد للطالب أو الطالبة الجامعية المفروض إنهم يروحوا بيه الجامعة؟ طيب ما تقولوا لنا عليه يا جماعة لأننا بصراحة مش عارفين والناس قالت لنا إن الجامعة فيها حرية في كل حاجة..
علشان كده هنعرف مع بعض دلوقتي إيه هو اللبس والشكل المناسب للبنت أو الشاب الجامعي.
وطبعا هنبدأ بالبنات
بالنسبة للبس
شوفي يا قمر، فيه شوية حاجات كده بسيطة ياريت تاخدي بالك منها وإنتِ بتختاري لبس الجامعة والحاجات دي هي:-
1- إنك تختاري الملابس العملية اللي تساعدك على الحركة براحتك في الجامعة أو في المواصلات والملابس العملية المريحة دي بتكون عبارة عن بنطلون قماش أو جينز أو جيب واسعة وبلوزة وياريت كمان تختاري الملابس اللي بيدخل في صناعتها مواد قطنية وده لأنها بتمتص العرق ومش بتسبب حساسية للجلد.
2- ياريت وإنتِ بتختاري هدومك إنك ماتجريش وراء الموضة وشوفي إيه اللبس اللي يناسبك، يعني مش معقول إن علشان الموضة هي الألوان الغامقة إنك تلبسي ألوان غامقة بالرغم من إنها مش مناسبة للون بشرتك.
3- خلي شعارك طول ما إنتِ في الجامعة هو "لا للكعب العالي" لأنه بصراحة متعب جدا جدا خاصة كمان وإنك ممكن تقضي طول النهار في المحاضرات ومش هيساعدك على الحركة في المواصلات أو في الجامعة..
4- بالنسبة للشنط هتلاقي إن الشنط الكبيرة هي أكتر حاجة هتكون مناسبة ليكِ طول ما إنتِ في الجامعة وده لأنك هتستفيدي منها في إنك تحطي فيها الكتب والأوراق الخاصة بيكِ.
5- وخدي بالك إن الجامعة آه صحيح فيها حرية في اللبس بس مش معنى كده إنك تروحي الجامعة لابسة جيب قصيرة أو ملابس لافتة للنظر لأن الملابس اللي زي دي بتدي انطباع سيئ عنك عند زملائك..
بالنسبة للوك أو الشكل بتاعك
لو كنتِ محجبة
يبقى ياريت تبعدي في اختيارك عن الإيشاربات اللي فيها تطريز كتير والإيشاربات البوليستر لأنها متعبة جدا في اللبس وبتتزحلق كل شوية. واختاري الإيشاربات اللي بيكون قماشها قطن أو شيفون لأن الأقمشة دي بالذات بتكون مريحة جدا وعملية في اللبس وكمان بتستحمل. وخدي بالك إن ألوان الإيشاربات تكون مناسبة جدا وماشية على لون هدومك وعلى لون بشرتك..
لو مش محجبة
حاولي إنك تختاري تسريحات الشعر البسيطة اللي تناسب الجامعة وبلاش تروحي الجامعة وإنتِ فاكّة شعرك أو عاملة تسريحة كأنك رايحة سهرة..
وبالنسبة للمكياج
أكيد طبعا إنتِ عارفة إن مكياج الجامعة لازم يكون مكياج بسيط قوي، يعني كفاية إنك تحطي روج وكحل على خفيف.
بالنسبة للشباب
طبعا لبس الشباب مافيش أسهل منه، كل الحكاية بنطلون قماش أو جينز وتي شيرت أو قميص، بس برضه فيه شوية حاجات لازم تاخدوا بالكم منها لزوم الشياكة وهي:
1- إنك لو هتلبس بنطلون قماش يبقى بلاش تلبس عليه تي شيرت والبس عليه قميص عادي والعكس طبعا بنطلون جينز على تي شيرت.
2- بلاش موضوع الاسبايكي ده وإنت رايح الجامعة لأنه بيدي انطباع إنك طالب مستهتر... ولو بتحب الاسبايكي قوي يبقى اعمله وإنت رايح النادي أو وإنت خارج مع أصحابك.
3- تاني حاجة ياريت تاخدوا بالكم منها هي إنكم ماتمشوش وراء الموضة اللي موجودة في السوق واختاروا اللبس المناسب حتى لو كان مش موضة لأنه ممكن يكون أحسن ويخليك متميز عن باقي زملائك.
وخدوا بالكم
مش شرط أبدا تشتروا حاجات غالية علشان تكونوا شيك بل على العكس فيه حاجات رخيصة وشيك جدا وعلى فكرة ألف باء شياكة هي "البساطة في اللبس".
وبلاش تقعوا في الخطأ اللي بيقع فيه طلاب كتير وهو إنهم بيكتروا من شراء الملابس الصيفية بالرغم من إن الفصل الدراسي الأول مش بيكون أكتر من شهرين فقط وباقي السنة بتكون شتاء، علشان كده ياريت ماتكتروش من شراء الملابس الصيفية على حساب الملابس الشتوية..
واوعوا تنسوا إن الصيف بيحب الألوان الفاتحة والشتاء بيحب الألوان الغامقة
موضوع: الحياة الجامعية الجديدة 
الجمعة 07 سبتمبر 2007, 2:35 am